Mat 15 | ASO | STEP | Neloti' nene Halisaio' mono' laa' ave linge masi avo'ningelite lani' mono' apizi ngimaa' ave linge masi Zelusalemi numudati' Izesu' neida ani'. Igi ti' li longo' i-dani':

Matthew 15

O'moso'mi Lou' Gamazi Ne'mo Avo'ningelite Lani' Gamazi Nene Ivile' Ogo Minine'.

(Maleko' 7:1-13)

1 Neloti' nene Halisaio' mono' laa' ave linge masi avo'ningelite lani' mono' apizi ngimaa' ave linge masi Zelusalemi numudati' Izesu' neida ani'. Igi ti' li longo' i-dani': 2 Gei' izipaha zuho ingine noso' nite' nalisa a'ine noso izamaa' nani' nene avotemote e'metilo li li-limaa' ani' gamazi nene avuto' iga' nani' nene ne'mine amilizanako nanimu' avuto' iga' nave. 3 Likevo Izesu' aza ti' lo lo-ngimine': Ido' langisetine avotemotidati' monovote nene do minelone li O'moso'mo lou' gamazi lo huko-lidine' nene avuto' iga' nani' nene nanimu' nave. 4 Ne'mine noluvoni' mene lingine ti' iga' nangumu' noluve: O'moso'mo lingine izetingine metinginemu' gilavo dizavo gelekele' lamine' i-ngidivo' minilo. Ido' ma nene ve mali'mo izelehingi melehingi gamazi goloso lo-ngedeline' nene bilikevo helelive lo line'. 5 Line'za lingine ti' li laa' nave: Ve mali'mo izelehinemupe melehinemupe inite' molo nouvonguti' nene ma gimuvodiba a'mine inite' nene mo O'mosomu' ogo molo nouvonako gei' gemamolosuve lo lo-emeline' nene a'mine line' inite' nene izele mele ngemamiline' nene lamine' ve. Ne'mine laa' nani' nene izelehine melehinemu' gelekele' lamine' amiline' aka nene si'zi-daa' nave. A'ne'mine ani' nene avotingidati' di minani' gamazi ne'mo O'moso'mo line' gamazi neve haza nite' lolo' oga' neive. 7 Lingine lutine goloso o vine' nene di halekisa evene' lamine' gili monaa' nave, polohete Isaia' O'moso'mi veleti' gamazi ti' lo line' ma nene lengikumu' lamine' lani' neive:

8 Mene aleve ingine ve'ine avileloti' nopo'ni li
neni' gulive di hozi laa' nani' nene
lu'ine nezela milamavo lu'ine've nene hoto' minaa' neive. 9 Haza eveneliti gamazi nene neze gamazi gidini lolo' ogavo
li-ngimi ngimi' igi minaa' nani' nenako
nenikumu' nopo'ni laa' nani' nene gopo hazamu' laa' nave.

Lute Do Gopo Oga' Neine' Initekumu' Izesu' Line' Gamazi

(Maleko' 7:14-23)

10 Ne'mine lo Izesu' aza evene' muki' nene asi lo-ngemo ti' lo lo-ngimine': 11 Lingine inite' ma nikevo ne'mo evene' lu'ine do goloso o-ngedaa' neive li gilaa' nahe. Gamazi mene gilii gili nge li gililo. Evene' lu'ine do goloso o-ngedaa' neine' inite' nene ve'ningu' mili naa' nani' inite' nene nevoba lu'ninguti' dizo ve'ninguti' soto' ogo leme heta oga' neine' inite' ne'mo nene lu'ine do goloso o-ngedaa' neive. 12 Ne'mine lavo alinge' nene izipahala zuho ingine Izesu' neida igi ti' li longo' i-dani': Halisaio' mono' laa' ave ingine gei' gamazi laningumu' mulu'ningu' goloso ogavo upuho' ani' nene ningabe. 13 Ne'mine likevo Izesu' aza gamazi ti' lo lo-ngimine': Okulumoku' me'nehi evenele nene ei' mi've ne'mine nizanako aza me'neho zuho' amivo a'mine mi'veu' gopo dizani' inite' muki' nene kiselo do huloloseive. 14 A'mine Halisaio' mono' laa' ave nene ningi mati-ngimikilo. Minilizaze. Ingine evene' mono' akalo' ngele'mizi vaa' ave nizani'za angise'ine aka ningi guni isa'manako ve'ine likivete ve'ine likive ma nene aka ngelebizi vani' gelave. Nemu' nene vele likive mali'mo vele likive ma ele'mizo viline' nene sitato' galeseu' velehe' limilisasive. 15 Ne'mine lavo Petolo' ti' lo lo-imine': Gaza gamazi monovo've haleko minine' gepe' gamazi ne'mine laine' ma nene lo ngolo' lo lo-lemevo. 16 Ne'mine lavo Izesu' ti' lo line': Izipaha'ne zuho lingine gili nilisave lo giluvoni'za linginesi olihe gili guni amahe. 17 Inite' muki' nene ve'ningu' nikevo gatu'ningu' lemo ise galeseu' vaa' neine' nene lingine ningi gilamahe. 18 Ne neine'za ve'ninguti' leme heta oga' neine' inite' nene lu'ninguti' dizo oga' neinako ne'mo nene evene' lu'ine do goloso o-ngedaa' neive. 19 Inite' lu'ninguti' dizaa' neine' inite' nene ne'mino neive: Ga'ine goloso gilaa', evene' ngebele helaa', vene' vemoho' alungo umungive gopo ingi monaa', gumine damine oga', soza sakupo gamazi laa' ido' evene' dovo ledevo' ogo ngemenga laa' monovo ne neive. 20 Mene inite' muki' ne'mo nene evene' lu'ine do goloso o-ngedaa' neive. Evene' a'ine noso izami noso' nite' gopo nani' ne'mo nene lu'ine do goloso o-ngedesa'mive.

Zuda Vene' Minamine' Kanaha Misubokoti' Vene' Mali'mo Gele Ele'vole' Ine' Gamazi.

(Maleko' 7:24-30)

21 Ne'mine ogo Izesu' aza a'mine minine' misubo nene hulo vo Tilo numuno ebe' ido' Sidoni numuno ebe' neti gahevela minine' misubou' volosa vine'. 22 A'mine numuno ebe' gahevelati' Zuda vene' minamine' Kanaha vene' mali'mo ogo gamazi nabati' ti' lo lo-imine': Guvekasi ve, gozopo' guvelesi ve naba Davidi' a'vopilemo' ezelo' medelo minanive make, gaza mulumo'ne ningevo. Alune nene sikalahu' goloso lulouko neivo mo goloso ogo neive. 23 Ne'mine line'za a'mine gamazi'velo' nene Izesu' gamazi hamokisi mo lo-emamine'. Ne'mine ogavo izipahala zuho ingine ezela igi ti' li lani': Vene' mene gamazi lo'mo lo'mo le'meto ogo minine' nenako nemu' imiselo huliline lo nogilune. 24 Likevo Izesu' ti' lo line': Naza nene nimiselive nene Isilaele' aleve sipisipi ne'mine mini vi tolovo igi moni minani' engita vo gono daline lo nimiselavo uvoni' nouve. 25 Ne'mine line'za vene' aza ogo gizeneu' golo hizo ongo ti' lo line': Guvekasi ve, ogo gamazi'ne gelo hize apase-nedelibo. 26 Ne'mine lavo Izesu' aza ti' lo line': Izipeliti noso' nite' ipe' ogo gulo hulo-ngemaa' nene edamive. O'moso'mi izipahala zuho Isilaele' aleve do lamine' o-ngedaa' nouvoni' nene heta ato' ve geita oloni' nene a'mine'mine ogo edamilihe lo gele nouve. 27 Lavo vene' aza ti' lo lo-imine': Guvekasi ve, izipeliti noso' nite'ine ipe' ogo gulo hulo ngemaa' nene edamive lo lamine' laine'za me'ninge noso' nite' naa' ani' holomoloti' lana do'mozine' nene gulo nete ha naa' nave. Nemu' nene heta ato' vene' nenikisi nene gele nemeline' nene ha lamine' oloseive. 28 Ne'mine lavo gelo Izesu' ti' lo lo-imine': Aizo, vene' mene gaza gele ele'vole' aineka nene mo gele ele'vole' ogo gelane. Nemu' nene gele ele'vole' aine' initeka nene ha soto' o gemeleseive. Lavo noline' velesi aluvo nene lamine' ine' ve.

Izesu' Evene' muki' Do Lamine' O-ngidine' Gamazi

29 Izesu' aza a'mine minine' ebe' nene hulo tine' molo nGalilaia noso ohuno gahevela nene lemo vo gololo' dizo vo minine'. 30 Ne'mine ogavo evene' muki' ingine gebili mini gize'ine a'ine goloso o vine' ido' ve'ine like vine' ido' gamazi lamilizani' o vive ido' inite' gizi dave masi masi muki' nene ngele'mizi Izesuda vi gizenela ingi-ngidikevo aza do lamine' o-ngidine'. 31 Ne'mine ogavo vene' vemoho' muki' ingine ningi negi nete gamazi api' igi lani', oko'nido' goloso ine' aleve lamine' ani', gize'ine goloso o vine' aka monani', ido' ve'ine likive gohi ve'ine ningani' nene ningi vo'ine goloso vavo mini engi' Isilaele' aleveti O'moso'ine nene opo'ni li gulive've di hozi lani'.

Izesu' Aza Evene' Fo (4) Tauseni Noso' Nite' nGimine' Gamazi

(Maleko' 8:1-10)

32 Ne'mine ogo Izesu' aza izipahala zuho asi lo-ngemavo ikevo ti' lo lo-ngimine': Mene aleve nene nazasi gamene sito hamo maka' minunidi'mo noso' nite'inesi nomivo engikumu' mulu'ne hukave. Akalo' ga'na'mo ve'ine ga'ine monavo di'mozikelizave lo noso' nite' namavo haza ngimiselamolove lo gele nouve. 33 Ne'mine lavo izipahala zuho ingine ti' li lani': Ebe' hadivelo' noune' nenako nemu' nene noso' nite' vai' ado' evene' vai' me'minelite nalizani' votigilelo' nene zalati' dalone. Dalone' akate nene ma nomive. 34 Likevo Izesu' ti' lo lo-ngimine': Lengita sikoni nanike' neve. Lavo ingine lani': Seveni ve ido' alaha' ngomosikisi ma neive. 35 Likevo evene' muki' nene mito' minilizave li li-ngidilizave lo Izesu' lavo li-ngidikevo mito' minani'. 36 Minikevo sikoni seveni nesi alaha' nesi do O'moso opo'ni lo noso' nite' nene gito apilo izipahala zuho ize' molo ngemavo evene' nene di moni ngimani'. 37 nGimikevo mukito' ni gatu'ine ani'. Gatu'ine ogavo lumo sama hulani' nene izipahala zuholite gosuvaha' naba seveni ne'mine go'zi vai' lani'. 38 Noso' nite' nani' nene vemoho' fo (4) tausenilite nani'za vene' izipe nene gatamune. 39 Ne'mine ikevo Izesu' evene' muki' nene ngimisele huloko sipiu' dizo izipahala zuhosi Magadani misubola vani'.